ഇഷ്ടമുള്ളയാളോട് എങ്ങനെ സംസാരിച്ചു തുടങ്ങാം

ഇഷ്ടമുള്ളയാളോട് ആദ്യം എന്തു പറയണം?

ഇഷ്ടമുള്ളയാളോട് എങ്ങനെ സംസാരിച്ചു തുടങ്ങണമെന്ന് അറിയില്ലെങ്കിൽ, ഒരു ഹായ് പറയൂ, നിങ്ങൾ രണ്ടുപേർക്കും ശരിക്കും പൊതുവായുള്ള എന്തെങ്കിലും പറഞ്ഞ് എളുപ്പത്തിൽ മറുപടി പറയാവുന്ന ഒരു ചോദ്യം ചോദിക്കൂ. ഇങ്ങനെ പറഞ്ഞുനോക്കാം: “കോളേജിനടുത്തുള്ള ആ കഫേയുടെ കാര്യം പറഞ്ഞിരുന്നില്ലേ. അവിടെ പോയോ?” മറുപടി പറയാൻ അവർക്ക് സമയം കൊടുക്കൂ. പിന്നെ അവർ പറയുന്നതിനോട് പ്രതികരിക്കൂ.

ആദ്യത്തെ സംഭാഷണം ചെറുതായാലും മതി. ഇഷ്ടമുള്ളയാളെക്കുറിച്ച് ഒരു കാര്യം അറിയുക, നിങ്ങളെക്കുറിച്ച് ഒരു കാര്യം പറയുക എന്ന ചെറിയൊരു ലക്ഷ്യം വെക്കൂ.

സംസാരം തുടങ്ങുമ്പോൾ ഈ മൂന്ന് കാര്യങ്ങൾ ചേർക്കാം:

• ഒരു അഭിവാദ്യം: “ഹായ്, സാം.”
• പൊതുവായൊരു കാര്യം: “പാചകം പഠിക്കുകയാണെന്ന് പറഞ്ഞിരുന്നല്ലോ.”
• എളുപ്പമുള്ളൊരു ചോദ്യം: “ഈയിടെ എന്തെങ്കിലും നല്ലത് ഉണ്ടാക്കിയോ?”

അവർ നിങ്ങളോട് പറഞ്ഞ ഒരു കാര്യമോ, എല്ലാവർക്കും കാണാവുന്ന രീതിയിൽ അവർ സ്വയം പങ്കുവെച്ച എന്തെങ്കിലുമോ, നിങ്ങൾക്ക് ചുറ്റും നടക്കുന്ന ഒരു കാര്യമോ ഉപയോഗിക്കാം. അവരുടെ profile-ൽ മൂന്ന് വർഷം പിന്നിലേക്ക് പോയി കണ്ടെത്തിയ ഒരു അവധിയാത്രയെക്കുറിച്ചുള്ള ആദ്യ സന്ദേശം, അവർക്ക് ബുദ്ധിമുട്ടു തോന്നുന്നത്ര വ്യക്തിപരമായിപ്പോകാം.

ഇഷ്ടമുള്ളയാളോട് നേരിൽ എങ്ങനെ സംസാരിച്ചു തുടങ്ങാം?

അവർക്ക് സംസാരിക്കാൻ സൗകര്യമുള്ള സമയം തിരഞ്ഞെടുക്കൂ: ക്ലാസിനായി കാത്തിരിക്കുമ്പോഴോ, ഇടവേളയിലോ, ഒരുമിച്ച് എന്തെങ്കിലും ചെയ്തുകഴിഞ്ഞോ. ട്രെയിൻ പിടിക്കാൻ തിരക്കിട്ട് പോകുന്നയാൾക്കോ ഹെഡ്‌ഫോൺ വെച്ചിരിക്കുന്നയാൾക്കോ സംസാരത്തിൽ ശ്രദ്ധിക്കാൻ അധികം കഴിയണമെന്നില്ല.

പരിചയപ്പെട്ടിട്ടില്ലെങ്കിൽ, അതു ലളിതമായി ചെയ്യാം:

“ഹായ്, ഞാൻ മായ. വ്യാഴാഴ്ചത്തെ ക്ലാസിൽ നമ്മൾ ഒരുമിച്ചാണെന്നു തോന്നുന്നു. ക്ലാസ് എങ്ങനെയുണ്ട്?”

നേരത്തേ അറിയാവുന്ന ആളാണെങ്കിൽ, അവർ പറഞ്ഞിരുന്ന ഒരു കാര്യത്തിലേക്ക് മടങ്ങാം:

“പ്രസന്റേഷൻ എങ്ങനെ പോയി? ഇന്നുരാവിലെയാണെന്ന് പറഞ്ഞിരുന്നല്ലോ.”

അവരുടെ മറുപടിയിൽനിന്ന് അടുത്തതായി എന്തു പറയണമെന്ന് തീരുമാനിക്കൂ. പ്രൊജക്ടർ കേടായെന്ന് പറഞ്ഞാൽ, പിന്നെ എങ്ങനെ കാര്യങ്ങൾ നടത്തിയെന്ന് ചോദിക്കൂ. സംഗീതത്തെക്കുറിച്ച് ശ്രദ്ധയോടെ തയ്യാറാക്കിവെച്ച ചോദ്യം മറ്റൊരു സമയത്തേക്ക് മാറ്റിവെക്കാം.

സംസാരം അവസാനിപ്പിക്കുന്നതും എളുപ്പമാകട്ടെ. കുറച്ചുനേരം സംസാരിച്ചശേഷം “ഞാൻ ഊണ് കഴിക്കാൻ പോവാ. സംസാരിക്കാൻ പറ്റിയതിൽ സന്തോഷം” എന്നു പറയാം. നല്ലൊരു സംഭാഷണം രണ്ടു മിനിറ്റ് മാത്രം നീണ്ടുനിന്നാലും കുഴപ്പമില്ല.

അവർ ചെയ്തുകൊണ്ടിരുന്ന കാര്യത്തിലേക്ക് വീണ്ടും വീണ്ടും തിരിയുകയോ പോകണമെന്ന് പറയുകയോ ചെയ്താൽ, സംസാരം അവസാനിക്കാൻ അനുവദിക്കൂ.

text വഴി എങ്ങനെ സംസാരിച്ചു തുടങ്ങാം?

നിങ്ങൾ എന്തിനാണ് എഴുതുന്നതെന്ന് ഇഷ്ടമുള്ളയാൾക്ക് മനസ്സിലാകാൻ വേണ്ടത്ര വിവരങ്ങളുള്ള ഒരു സന്ദേശം അയയ്ക്കൂ. വെറുമൊരു “ഹായ്” എന്നതിനെക്കാൾ, ഒരു പ്രത്യേക കാര്യം പറഞ്ഞുതുടങ്ങുമ്പോൾ അവർക്ക് മറുപടി പറയാൻ എളുപ്പമാകും.

നിങ്ങൾക്ക് ശരിക്കും അറിയാവുന്ന കാര്യത്തിന് യോജിക്കുന്ന ഉദാഹരണം തിരഞ്ഞെടുക്കൂ:

• നേരിൽ കണ്ടതിന് ശേഷം: “ഹായ്, പ്രിയയുടെ ഡിന്നറിൽ കണ്ട അലക്സാണ്. വായിക്കാൻ പറഞ്ഞ ആ പുസ്തകത്തിന്റെ പേരെന്താ?”
• ഒരേ പരിപാടിയിൽ പങ്കെടുത്തതിന് ശേഷം: “ആ ക്വിസിലെ ചോദ്യത്തെക്കുറിച്ച് ഇപ്പോഴും ആലോചിക്കുവാ. ആർക്കെങ്കിലും ശരിക്കും ഉത്തരം അറിയാമായിരുന്നോ?”
• ഒരു സ്റ്റോറിക്ക് മറുപടി നൽകുമ്പോൾ: “ആ പാസ്ത കാണാൻ കൊള്ളാമല്ലോ. സ്വയം ഉണ്ടാക്കിയതാണോ?”

ഒരു പെൺകുട്ടിയോട് text വഴി സംസാരിച്ചു തുടങ്ങുമ്പോഴും ഒരു ആൺകുട്ടിക്ക് സന്ദേശം അയയ്ക്കുമ്പോഴും ഇതേ കാര്യം ബാധകമാണ്: ആ വ്യക്തിയെക്കുറിച്ച് നിങ്ങൾക്ക് അറിയാവുന്ന കാര്യങ്ങൾ ഉപയോഗിക്കൂ. ഒരാളുടെ ലിംഗം നോക്കി അവരുടെ താൽപര്യങ്ങളോ ഇഷ്ടമുള്ള സംസാരരീതിയോ അറിയാനാവില്ല.

നിങ്ങൾ തമ്മിൽ ഇതുവരെ സംസാരിച്ചിട്ടില്ല, അവരുടെ നമ്പർ കിട്ടിയത് ജോലിസ്ഥലത്തെ ഫോൺ നമ്പർ പട്ടികയിൽനിന്നോ മറ്റൊരാളിൽനിന്നോ ആണ് എങ്കിൽ, നിങ്ങൾ രണ്ടുപേരും ഇടപഴകുന്ന ഇടത്തിൽ ആദ്യം സ്വയം പരിചയപ്പെടുത്തൂ. എന്നിട്ട് chat ചെയ്യാൻ താൽപര്യമുണ്ടോ എന്ന് ചോദിക്കൂ.

സന്ദേശം അയച്ചുകഴിഞ്ഞാൽ, മറുപടി പറയാൻ അവർക്ക് സമയം കൊടുക്കൂ. പിന്നാലെ “ക്ഷമിക്കണം, പെട്ടെന്ന് ഇങ്ങനെയൊരു സന്ദേശം അയച്ചതിന്” എന്നു കൂടി അയക്കുന്നത്, സാധാരണയായി അവർ മറുപടി പറയേണ്ട സന്ദേശങ്ങളുടെ എണ്ണം കൂട്ടുകയേ ഉള്ളൂ.

ഒരു dating app-ൽ എങ്ങനെ സംസാരിച്ചു തുടങ്ങാം?

അവർ സ്വന്തം profile-ൽ ചേർക്കാൻ തീരുമാനിച്ച ഒരു കാര്യത്തിൽനിന്ന് തുടങ്ങൂ. നീണ്ടൊരു മറുപടി എഴുതേണ്ടിവരാത്ത ചോദ്യം ചോദിക്കൂ.

പാചകത്തെക്കുറിച്ച് പറയുന്ന ഒരു profile ആണെങ്കിൽ:

“ക്ഷീണമുണ്ട്, പക്ഷേ എന്തെങ്കിലും നല്ലത് കഴിക്കണമെന്നുമുണ്ട്. അപ്പോൾ എന്താ ഉണ്ടാക്കാറുള്ളത്?”

വളരെ കുറച്ച് വിവരങ്ങൾ മാത്രമുള്ള ഒരു profile ആണെങ്കിൽ:

“ഹായ്, ഈ ആഴ്ച എങ്ങനെ പോകുന്നു? ഞാൻ ഇപ്പോ ജോലി കഴിഞ്ഞു. എന്തുണ്ടാക്കണമെന്ന് ആലോചിക്കുവാ.”

സാധാരണ ഒരു സന്ദേശം മതി. നിങ്ങൾ തമ്മിൽ വലിയൊരു പൊരുത്തം കണ്ടെത്തിയെന്നു നടിക്കാതെ തന്നെ നിങ്ങളെക്കുറിച്ച് ഒരു ചെറിയ കാര്യം പങ്കുവെക്കാം.

JustThen-ൽ നിങ്ങൾക്ക് എഴുതിയ സന്ദേശം അയയ്ക്കാം, അല്ലെങ്കിൽ വേണമെങ്കിൽ voice note ഉപയോഗിക്കാം. ഏതു രീതിയിലായാലും, വ്യക്തമായ ഒരു ആശയവും എളുപ്പമുള്ള ഒരു ചോദ്യവും മറ്റേയാൾക്ക് സംസാരിച്ചു തുടങ്ങാൻ സഹായിക്കും. voice note തിരഞ്ഞെടുക്കുന്നെങ്കിൽ, ചുരുങ്ങിയതും സ്വാഭാവികവുമായ ഒരു സന്ദേശം അവരുടെ മറുപടിക്ക് വേണ്ടത്ര ഇടം നൽകും.

ഇഷ്ടമുള്ളയാൾ മറുപടി പറഞ്ഞാൽ പിന്നെ എന്തു പറയണം?

മറ്റൊരു വിഷയത്തിലേക്ക് കടക്കുന്നതിനുമുമ്പ് അവരുടെ മറുപടിയിൽനിന്ന് തുടങ്ങൂ. അതിലെ ഒരു കാര്യമെടുത്ത്, അതുമായി ബന്ധപ്പെട്ട എന്തെങ്കിലും പങ്കുവെക്കൂ. കൂടുതൽ അറിയാൻ തോന്നുമ്പോൾ അതിനെക്കുറിച്ച് മറ്റൊരു ചോദ്യം ചോദിക്കൂ.

ഒരു സംഭാഷണ ഉദാഹരണം

ഇഷ്ടമുള്ളയാൾ പുതിയൊരു കഫേയെക്കുറിച്ച് പറഞ്ഞതിന് ശേഷം സംഭാഷണം ഇങ്ങനെ മുന്നോട്ടുപോയേക്കാം:

നിങ്ങൾ: “പറഞ്ഞ ആ കഫേയിൽ ഒടുവിൽ പോയോ?”

നിങ്ങൾക്ക് ഇഷ്ടമുള്ളയാൾ: “പോയി. കാപ്പി കൊള്ളാം, പക്ഷേ ഭയങ്കര തിരക്കായിരുന്നു.”

നിങ്ങൾ: “ഞാൻ സാധാരണ ജോലിക്ക് പോകും മുമ്പാ പോകാറ്. അപ്പോൾ സ്ഥലങ്ങളിലൊക്കെ തിരക്ക് കുറവായിരിക്കും. ഇനിയും അവിടെ പോകുമോ?”

നിങ്ങൾക്ക് ഇഷ്ടമുള്ളയാൾ: “ഉറപ്പായും. ശനിയാഴ്ച രാവിലെ മാത്രം ഒഴിവാക്കിയാൽ മതി.”

നിങ്ങൾ: “പറഞ്ഞത് നന്നായി. ഞാനാണെങ്കിൽ ശനിയാഴ്ച തന്നെ പോയേനേ.”

അവസാനത്തെ സന്ദേശത്തിൽ ചോദ്യമില്ല. നിങ്ങൾ പ്രതികരിച്ചു, ഒരു കാര്യം കൂട്ടിച്ചേർത്തു, അവർക്ക് സംസാരിക്കാൻ ഇടവും കൊടുത്തു.

സഹോദരങ്ങൾ, സിനിമകൾ, ജോലി, വാരാന്ത്യത്തിലെ പരിപാടികൾ എന്നിങ്ങനെ പരസ്പരം ബന്ധമില്ലാത്ത ചോദ്യങ്ങൾ ഒന്നിനു പിറകെ ഒന്നായി ചോദിക്കാതിരിക്കൂ. ഒരു വിഷയത്തിൽത്തന്നെ തുടരുന്നത് അടിസ്ഥാന വിവരങ്ങൾക്കപ്പുറം എന്തെങ്കിലും പറയാൻ നിങ്ങൾ രണ്ടുപേർക്കും അവസരം നൽകും.

രണ്ടുപേരും സംഭാഷണത്തിൽ പങ്കുചേരുന്നുണ്ടെങ്കിൽ, ചെറിയൊരു സത്യസന്ധമായ അഭിപ്രായത്തിലൂടെ text വഴി flirt ചെയ്യാം: “നിന്നോട് സംസാരിക്കാൻ എനിക്കിഷ്ടമാണ്. നീയുള്ളതുകൊണ്ട് എന്റെ lunch break കുറച്ചുകൂടി രസമാണ്.” നിങ്ങൾക്ക് പരസ്പരം എത്രത്തോളം പരിചയമുണ്ട് എന്നതിന് യോജിക്കുന്നതാകണം അത്.

സംസാരത്തിനിടെ ഒരു ചമ്മൽ വന്നാൽ എന്തു ചെയ്യും?

ഒരു ഇടവേള വന്നാൽ, അടുത്തതായി എന്തു പറയണമെന്ന് രണ്ടുപേർക്കും ഉടനെ കിട്ടിയില്ല എന്നുമാത്രമാകാം. അവർ പറഞ്ഞ ഒരു കാര്യത്തിലേക്ക് മടങ്ങാം, നിങ്ങൾ ശ്രദ്ധിച്ച ചെറിയൊരു കാര്യം പറയാം, അല്ലെങ്കിൽ സ്നേഹത്തോടെ സംഭാഷണം അവസാനിപ്പിക്കാം.

പരിഭ്രമം കാരണം വാക്കുകൾ തപ്പിപ്പോയാൽ, അതൊന്ന് ചെറുതായി പറഞ്ഞാൽ മതി:

“ഒരു നിമിഷം എന്താ പറയാൻ വന്നതെന്നു മറന്നുപോയി. ഇപ്പോഴാണ് ഇങ്ങോട്ടു താമസം മാറിയതെന്നല്ലേ പറഞ്ഞത്?”

നിങ്ങളുടെ തമാശ ഏൽക്കാതെ പോയാൽ, അത് മൂന്നുതവണ വിശദീകരിക്കാതിരിക്കൂ. “ആലോചിച്ചപ്പോൾ ഇതിലും തമാശ തോന്നിയിരുന്നു” എന്നു പറഞ്ഞ് മുന്നോട്ടുപോകാം. തമാശ അവരെ വേദനിപ്പിച്ചെങ്കിൽ, നേരെ ക്ഷമ ചോദിക്കൂ.

ഇഷ്ടമുള്ളയാൾ ചെറിയൊരു മറുപടി പറഞ്ഞാൽ, സംഭാഷണം മുഴുവനായി നോക്കൂ. ഒറ്റ “ആ” കൊണ്ട് കാര്യം വ്യക്തമാവില്ല. തിരിച്ചൊരു ചോദ്യമോ മറ്റെന്തെങ്കിലും കൂട്ടിച്ചേർക്കലോ ഇല്ലാതെ വീണ്ടും വീണ്ടും ചെറിയ മറുപടികൾ മാത്രം വരുന്നത്, അല്പം പിൻവാങ്ങാനുള്ള കാരണമാണ്. രണ്ടുപേർക്കും വേണ്ടിയുള്ള സംസാരവിഷയങ്ങൾ നിങ്ങൾ മാത്രം കണ്ടെത്തിക്കൊണ്ടിരിക്കേണ്ടതില്ല.

ഇഷ്ടമുള്ളയാൾ മറുപടി പറഞ്ഞില്ലെങ്കിൽ എന്തു ചെയ്യും?

മറുപടി കിട്ടാത്ത ഒരു സന്ദേശംകൊണ്ട് അവർ എന്താണ് ചിന്തിക്കുന്നതെന്ന് കൃത്യമായി അറിയാനാവില്ല. അവർ തിരക്കിലായിരിക്കാം, എന്തു പറയണമെന്ന് അറിയാതിരിക്കാം, അല്ലെങ്കിൽ താൽപര്യമില്ലായിരിക്കാം. ഇതിൽ ഏതാണെന്ന് തീർച്ചപ്പെടുത്താതെ തന്നെ ആ സന്ദേശം അങ്ങനെ വിടാം.

വീണ്ടും text അയയ്ക്കണോ എന്ന് തീരുമാനിക്കുകയാണെങ്കിൽ, ഇതുവരെ നിങ്ങൾ തമ്മിലുണ്ടായ സംഭാഷണം പരിഗണിക്കൂ. മുമ്പ് പലതവണ രണ്ടുപേരും പങ്കെടുത്ത chat ഉണ്ടായിട്ടുണ്ടെങ്കിൽ, പിന്നീടൊരിക്കൽ ബന്ധപ്പെട്ട ഒരു കാര്യത്തെക്കുറിച്ച് ഒരു സന്ദേശം കൂടി അയയ്ക്കുന്നത് ന്യായമായിരിക്കാം. ആദ്യത്തെ സന്ദേശത്തിന് മറുപടി കിട്ടിയില്ലെങ്കിൽ, മറുപടി പറയണോ എന്ന് തീരുമാനിക്കാൻ അവർക്ക് സമയം കൊടുക്കൂ.

ചോദ്യചിഹ്നങ്ങൾ അയയ്ക്കുന്നതും വിശദീകരണം ആവശ്യപ്പെടുന്നതും അവരുടെ ശ്രദ്ധ കിട്ടാൻ മറ്റൊരു app വഴി ബന്ധപ്പെടുന്നതും ഒഴിവാക്കൂ. പിന്നീട് അയച്ച സന്ദേശത്തിനും മറുപടി കിട്ടിയില്ലെങ്കിൽ, നിങ്ങളായിട്ട് വീണ്ടും സംസാരം തുടങ്ങാൻ ശ്രമിക്കാതിരിക്കൂ.

പിന്നീട് നേരിൽ കണ്ടാൽ, പതിവുപോലെ ഒരു ഹായ് പറഞ്ഞാൽ മതി. വായിക്കാത്ത സന്ദേശത്തെ ഒരു തർക്കവിഷയമാക്കേണ്ട കാര്യമില്ല.

“എനിക്ക് താൽപര്യമില്ല” എന്ന് വ്യക്തമായി പറഞ്ഞാൽ, അതിന് വേറെ അർഥം തേടേണ്ടതില്ല. വേറൊരു രീതിയിൽ സംസാരിച്ചു തുടങ്ങിയാൽ അവരെ സമ്മതിപ്പിക്കാമെന്നു കരുതി ശ്രമിക്കാതെ, ആ മറുപടി സ്വീകരിക്കൂ.

നിങ്ങളുടെ താൽപര്യം എപ്പോഴാണ് വ്യക്തമാക്കേണ്ടത്?

സംസാരം രണ്ടുപേരും താൽപര്യത്തോടെ മുന്നോട്ടുകൊണ്ടുപോകുന്നുവെന്നു തോന്നുമ്പോൾ, ലളിതവും വ്യക്തവുമായ ഒരു ക്ഷണം നൽകാം. അവരുടെ പങ്കാളിത്തം ശ്രദ്ധിക്കൂ: അവരും ചോദ്യങ്ങൾ ചോദിക്കുന്നുണ്ടോ, കൂടുതൽ കാര്യങ്ങൾ പറയുന്നുണ്ടോ, സ്വയം സംസാരം തുടങ്ങുന്നുണ്ടോ. ഇതൊക്കെ സംസാരിക്കാനുള്ള താൽപര്യം കാണിക്കുന്നു. പക്ഷേ പ്രണയതാൽപര്യമുണ്ടെന്ന് ഉറപ്പിക്കുന്നില്ല.

നേരെ ചോദിക്കുമ്പോൾ, എന്തിനാണ് മറുപടി പറയേണ്ടതെന്ന് അവർക്ക് വ്യക്തമാകും:

“നിന്നോട് സംസാരിച്ചത് എനിക്കിഷ്ടമായി. ശനിയാഴ്ച നമുക്കൊരു കാപ്പി കുടിക്കാൻ പോയാലോ?”

ശനിയാഴ്ച പറ്റില്ലെങ്കിലും അവർ മറ്റൊരു ദിവസം നിർദേശിച്ചാൽ, ബാക്കി കാര്യങ്ങൾ തീരുമാനിക്കൂ. വേണ്ടെന്നു പറയുകയോ, മറ്റൊരു ദിവസം നിർദേശിക്കാതെ വ്യക്തമായ മറുപടി തരാതിരിക്കുകയോ ചെയ്താൽ, ആ ക്ഷണം അങ്ങനെ തന്നെ വിടൂ. നിങ്ങളുടെ താൽപര്യം നിങ്ങൾ അറിയിച്ചു; ഇനി അവരും ഒരു ചുവടു മുന്നോട്ടുവെക്കണോ എന്ന് തീരുമാനിക്കട്ടെ.

ചുരുക്കത്തിൽ

• ഒരു അഭിവാദ്യവും നിങ്ങൾക്ക് ശരിക്കും പൊതുവായുള്ള ഒരു കാര്യവും എളുപ്പമുള്ള ഒരു ചോദ്യവും കൊണ്ട് തുടങ്ങൂ.
• അവരുടെ മറുപടിയോട് പ്രതികരിക്കൂ, നിങ്ങളെക്കുറിച്ച് എന്തെങ്കിലും പങ്കുവെക്കൂ.
• സംസാരത്തിലെ ഇടവേളകൾക്കും വൈകുന്ന മറുപടികൾക്കും കുറച്ച് സമയം കൊടുക്കൂ; സംസാരം മുന്നോട്ടുകൊണ്ടുപോകാൻ രണ്ടുപേരും ശ്രമിക്കുന്നുണ്ടോ എന്ന് ശ്രദ്ധിക്കൂ.
• നിങ്ങൾ തയ്യാറാകുമ്പോൾ വ്യക്തമായി ക്ഷണിക്കൂ, അവരുടെ മറുപടി മാനിക്കൂ.